ការចែករំលែក «បទពិសោធជោគជ័យក្នុងការត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ និងការតម្រង់ទិសក្នុងការជ្រើសរើសមុខជំនាញនៅថ្នាក់ឧត្តមសិក្សា» ជូនទៅដល់សិស្សថ្នាក់ទី១២

នាព្រឹកថ្ងៃសៅរ៍ ទី១៥ ខែមីនា ឆ្នាំ២០២៥ នៅវិទ្យាល័យព្រះស៊ីសុវត្ថិ មជ្ឈមណ្ឌលត្រាជូត្រេននីង បានសហការជាមួយសមាគមសាលាត្រាជូ ក្នុងការចែករំលែក «បទពិសោធជោគជ័យក្នុងការត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ និងការតម្រង់ទិសក្នុងការជ្រើសរើសមុខជំនាញនៅថ្នាក់ឧត្តមសិក្សា» ជូនទៅដល់សិស្សថ្នាក់ទី១២ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ នៅសម័យប្រឡង ខែសីហា ឆ្នាំ២០២៥ខាងមុខ។ កម្មវិធីខាងលើ មានការអញ្ជើញចូលរួមដោយ ឯកឧត្តម ផល ពិសាល នាយកមជ្ឈមណ្ឌលត្រាជូត្រេននីង និងលោក អីវ សៅសុខា តំណាងដ៏ខ្ពង់ខ្ពស់ លោក មូល ស៊ុយហេង នាយកវិទ្យាល័យព្រះស៊ីសុវត្ថិ ព្រមទាំង អ្នកហាត់ការច្បាប់ និងកម្មសិក្សាការីរបស់ត្រាជូត្រេននីង និងសមាគមសាលាត្រាជូ ព្រមជាមួយនឹង ក្រុមការងារស្នូល @CamEX និង @WeduShare ។

កម្មវិធីខាងលើនេះ រៀបចំឡើងក្នុងគោលបំណងចែករំលែកលើប្រធានបទដូចជា៖

• ទី១ «បទពិសោធនៃការត្រៀមរៀបចំខ្លួនដើម្បីឈានឆ្ពោះទៅការប្រឡងមធ្យមសិក្សាទុតិយភូមិឱ្យបានជោគជ័យ» ដោយនិស្សិត លឹម ប៉លី អតីតសិស្សនិទ្ទេស A ឆ្នាំ២០២៤ និងជាអតីតម្ចាស់ជ័យលាភីលេខ១ ផ្នែកគណិតវិទ្យា ក្នុងការប្រឡងសិស្សពូកែទូទាំងប្រទេសថ្នាក់ទី១២ ឆ្នាំ២០២៤។
• ទី២ «ការជ្រើសរើសមុខជំនាញ បន្ទាប់ពីបញ្ចប់ទី១២» ដោយលោក ទូច ស៊ាងលី តំណាងក្រុមការងារមជ្ឈមណ្ឌលត្រាជូត្រេននីង។
• ទី៣ «អាហារូបករណ៍ និងការសិក្សានៅបរទេស» ដោយតំណាង WEduShare។
• និងទី៤ «រៀន ស្ម័គ្រចិត្ត ឬធ្វើការ មានគុណសម្បត្តិ និងគុណវិបត្តិអ្វីខ្លះ?» ដោយលោក គង់ ជាតិសិលាខេមរ៉ូ ជាអគ្គលេខាធិការ នៃអគ្គលេខាធិការដ្ឋាន CAMEX។

ឆ្លៀតក្នុងឱកាសនេះ ត្រាជូត្រេននីង ក៏សូមគោរពថ្លែងអំណរគុណយ៉ាងជ្រាលជ្រៅគោរពជូន លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ និងគណៈគ្រប់គ្រងវិទ្យាល័យព្រះស៊ីសុវត្ថិ ដែលបានជួយសម្របសម្រួលយ៉ាងល្អក្នុងការរៀបចំកម្មវិធីនេះឡើងប្រកបដោយរលូន និងទទួលបាននូវលទ្ធផលល្អផងដែរ។

ជាចុងក្រោយ ត្រាជូត្រេននីង សូមជូនពរដល់សិស្សថ្នាក់ទី១២ទាំងអស់ សូមឱ្យការប្រឡងនាពេលខាងមុខនេះ ទទួលបាននូវលទ្ធផលល្អ និងទទួលបានជោគជ័យ។

👉 Facebook ៖ https://www.facebook.com/share/p/18VUxR9zY3/?mibextid=wwXIfr

👉 Channel Telegram ផ្លូវការរបស់ត្រាជូត្រេននីង តំណ៖ https://t.me/trajutraining