លោក ផល ពិសាល បញ្ចប់ថ្នាក់បរិញ្ញាបត្រជាន់ខ្ពស់ឯកទេសនីតិសមុទ្រ និងការកំណត់ព្រំដែនសមុទ្រនៃសាកលវិទ្យាល័យ Jean Moulin Lyon 3 ប្រទេសបារាំង។
សព្វថ្ងៃ លោកគឺជាអនុប្រធានសមាគមសាលាត្រាជូទទួលបន្ទុកផ្នែកស្រាវជ្រាវសិក្សាធិការនិងស្នាដៃ ព្រមទាំងផ្នែកកម្មវិធី ដែលនៅក្នុងនោះ លោកបានចូលរួមដឹកនាំវគ្គបណ្ដុះបណ្ដាលរបស់សមាគម និងវាយតម្លៃអត្ថបទស្រាវជ្រាវរបស់កម្មសិក្សាការី។ នៅក្នុងក្របខណ្ឌនេះដែរ លោកបានចូលរួមដឹកនាំ និងសម្របសម្រួលកម្មវិធីបាឋកថាសាធារណៈ វាក្យសព្ទច្បាប់ និងព្រឹត្តិបត្របច្ចុប្បន្នភាពគតិយុត្តប្រចាំសប្តាហ៍។
ក្នុងបទពិសោធន៍៤ឆ្នាំជាគ្រូឧទ្ទេសនីតិអន្តរជាតិសាធារណៈ លោកបង្រៀននៅថ្នាក់នីតិសាស្រ្តភាសាខ្មែរ និងថ្នាក់ពិសេសនីតិសាស្រ្តភាសាបារាំង នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ព្រមទាំងនៅដេប៉ាតឺម៉ង់សិក្សាអន្តរជាតិ នៃសាកលវិទ្យាល័យភូមិន្ទភ្នំពេញ។ មុននឹងចាប់ផ្តើមបម្រើការងារក្នុងប្រទេសកម្ពុជា លោកមានបទពិសោធន៍រយៈពេលប្រមាណ២ឆ្នាំជាង នៅក្នុងស្ថាប័នអន្តរជាតិ តួយ៉ាងដូចជាអង្គជំនុំជម្រះវិសាមញ្ញក្នុងតុលាការកម្ពុជា, តុលាការអន្តរជាតិនីតិសមុទ្រនៃទីក្រុង Hamburg ប្រទេសអាល្លឺម៉ង់ និងនៅឯវិទ្យាស្ថានម៉ាកស៍ប្លង់នៃនីតិសាធារណៈប្រៀបធៀប និងនីតិអន្តរជាតិ។
បន្ថែមពីលើនេះ លោកធ្លាប់ចូលរួមក្នុងវគ្គសិក្សារដូវក្តៅនៅបណ្ឌិត្យសភានីតិអន្តរជាតិនៅទីក្រុងឡាអេ ប្រទេសហូឡង់, វគ្គបណ្ដុះបណ្ដាលសម្រាប់អ្នកស្រាវជ្រាវវ័យក្មេងស្តីពីច្បាប់សមុទ្រនៅ ប្រទេសឥណ្ឌា, វគ្គបណ្ដុះបណ្ដាលនៃបណ្ឌិត្យសភានីតិសមុទ្រនៅប្រទេសអាល្លឺម៉ង់ និងវគ្គបណ្តុះបណ្ដាលផ្សេងៗនៅក្នុងប្រទេសបារាំង អង់គ្លេស ចិន និងកូរ៉េ។
បន្ទាប់ពីបញ្ចប់ការសិក្សាថ្នាក់បរិញ្ញាបត្រជាន់ខ្ពស់ លោកក៏បានដឹកនាំ និងបោះផ្សាយអត្ថបទស្រាវជ្រាវនានាដែលមានការចូលរួមពីសំណាក់អ្នកស្រាវជ្រាវដទៃទៀត។ ស្នាដៃទាំងអស់នោះ មានដូចខាងក្រោម៖
- នីតិសមុទ្រ និងអនុសញ្ញាសហប្រជាជាតិស្តីពីនីតិសមុទ្រឆ្នាំ១៩៨២ (៣៣ ទំព័រ),ការផ្សព្វផ្សាយរបស់សមាគមសាលាត្រាជូ, ខែកក្កដា ២០១៥, http://salatraju.com/index.php/post?p=38
- ឈ្វេងយល់អំពីនីតិវិធីច្បាប់អន្តរជាតិនៃការដោះស្រាយវិវាទសមុទ្រចិនខាងត្បូង៖ ករណីប្រទេសហ្វីលីពីន និងចិន (៥៦ទំព័រ), ការផ្សព្វផ្សាយរបស់សមាគមសាលាត្រាជូ, ខែកក្កដា ២០១៦, http://salatraju.com/index.php/post?p=88
- បទវិចារណកថា៖ ហេតុអ្វីបានជាប្រទេសកម្ពុជាមិនគួរបញ្ជាក់ជំហរគាំទ្រ ឬបដិសេធ ណា មួយទាក់ទងនឹងជម្លោះសមុទ្រចិនខាងត្បូង? ទស្សនៈអ្នកច្បាប់អន្តរជាតិ, ការផ្សព្វផ្សាយរបស់សមាគមសាលាត្រាជូ, ខែកក្កដា ២០១៦, http://salatraju.com/index.php/post?p=135
- ជំនួយស្មារតីស្តីពីកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ, ការផ្សព្វផ្សាយរបស់សមាគមសាលាត្រាជូ, ខែឧសភា ឆ្នាំ២០១៧, https://salatraju.com/post/215
- តំបន់ប្រាសាទសំបូរព្រៃគុក ៖ សញ្ញាណនៃបេតិកភណ្ឌពិភពលោកក្នុងក្របខណ្ឌច្បាប់ជាតិ និងអន្តរជាតិ (៣៣ ទំព័រ), ការផ្សព្វផ្សាយរបស់សមាគមសាលាត្រាជូ, ខែកក្កដា ឆ្នាំ២០១៧, https://salatraju.com/post/283
- ផល ពិសាល និងសូ សក្តា, ច្បាប់ស្តីពីការប្រកាសដាក់ប្រទេសក្នុងភាពអាសន្ន៖ បទពិសោធន៍ប្រទេសបារាំង (៣១ ទំព័រ), ការផ្សាយរបស់សមាគមសាលាត្រាជូ, ខែមេសា ឆ្នាំ២០២០, http://salatraju.com/post/513